ප්‍රියන්තගේ බ්ලොග් සටහන්.

ලොව අවම එක්දින ක්‍රිකට් කණ්ඩායම් ලකුණු සහ චමින්ද වාස්

2012-01-13T19:48:00.014+03:00

පහුගිය දවසක අපේ ශ්‍රී ලංකා ක්‍රිකට් කණ්ඩායම දකුණු අප්‍රිකාණු කණ්ඩායම හමුවේ ලකුණු 43ට දැවී ගියා. මේ පරාජයත් සමඟ අපේ සමහර ක්‍රිකට් ක්‍රීඩා ලෝලීන්ට ක්‍රිකට් ගැන කතා කරද්දිත් කේන්ති යනවා. ඒක ගැටලුවක් නෙමේ. මොකද අපි කවුරුත් කැමති අපේ කණ්ඩායම නිතර ජයග්‍රහනය කරනවනම් තමයි.

මීට පෙර අපේ කණ්ඩායම ලබාගෙන තිබුන අවම ලකුණු සංඛ්‍යාව තමයි බටහිර ඉන්දිය කණ්ඩායම හමුවේ ලබාගත් ලකුණු 55. එම වාර්තාව මෙවර බිඳ වැටුනා.මෙවර අපි ලබාගත්තෙ ලකුණු 43ක් පමණයි.එක්දින තරඟයකදී අපේ කණ්ඩායම ලබාගත් මේ ලකුණු සංඛ්‍යාව ලොව 4 වෙනියට ලබාගත් අවම ලකුණු සංඛ්‍යාව ලෙස වාර්තා පොත් වල ලියවුනා.

මේ විදියෙ වටපිටාවක් තුල මට නිකමට හිතුනා ලොව අඩුම කණ්ඩායම් ලකුණු ලබාගත් අනෙක් අවස්තාවන් තුන ගැන හොයල බලන්න. එතන මුලින්ම ඉන්නෙ ලකුණු 35ක් ලබාගත් සිම්බාබ්වේ කණ්ඩායමයි.දෙවනි ස්ථානය ලකුණු 36ක් ලබාගත් කැනඩා කණ්ඩායම.තුන්වෙනි ස්ථානය නැවතත් සිම්බාබ්වේ. ලකුණු 38යි. වැද්ගත්ම දේ තමයි මේ අවස්තා තුනේදිම මේ කණ්ඩායම් මේ විදියට දවාගත් කණ්ඩායම ශ්‍රී ලංකා කණ්ඩායම වීම.

මේ ලැයිස්තුව තවත් පහලට යද්දි, 9 වෙනි ස්ථානයේදී ප්‍රබල ඉන්දීය කණ්ඩායම ලකුණු 54ට දැවී ගිහින් තියනවා. එයත් ශ්‍රී ලංකා කණ්ඩායම හමුවේ.එහෙම බලද්දි පොඩි සතුටකුත් දැනෙනවා.හැම අඳුරු වලාවකම රිදී රේකාවක් තියනව කියල කියනවනෙ.

දැන් බලමු මේ කතාවට චමින්ද වාස්ගෙ තියන සම්බන්ධය මොකක්ද කියලා. එක්දින ක්‍රිකට් තරඟ ඉතිහාසයේ අඩුම කණ්ඩායම් ලකුණු ලබාගත් ප්‍රථම දෙවන හා තුන්වන අවස්තා වලදී ඒ දස්කම කල කණ්ඩායම අපේ ශ්‍රී ලංකා කණ්ඩායම්යි.මේ ඉනිම් තුනේදි අපි කඩුලු 30ක් දවාගෙන තියනවා.ඉන් කඩුලු 15ක්ම ලබාගෙන තියෙන්නෙ චමින්ද වාස්.

ඒ මෙන්න මේ විදියට

( 1) සිම්බාබ්වේ කණ්ඩායම 35 - වාස් කඩුලු 4
(2 ) කැනඩා කණ්ඩායම 36 - වාස් කඩුලු 4
( 3) සිම්බාබ්වේ කණ්ඩායම 38 - වාස් කඩුලු 8

මින් තුන්වන අවස්තාව වන කඩුලු 8ක් දවගත් අවස්තාව එක්දින ක්‍රිකට් ඉතිහාසයේ එක් ඉනිමක ක්‍රීඩකයකු ලැබූ ඉහලම කඩුලු සංඛ්‍යාව සඳහා වන ලෝක වාර්තාවයි.

ඒ විතරක් නෙමෙයි. මේ ලැයිස්තුවේ 9 වෙනි තැන ඉන්දීය කණ්ඩායම ලකුණු 54ට දැවී ගිය බව ඉහතින සඳහන් වුනා.එම තරහයේදීත් චමින්ද වාස් කඩුලු 5ක් ලබාගෙන තියනවා.

ඒ අවස්තාව මේ වීඩියෝ එකෙන් බලන්න පුලුවන්

පුංචි පුතාගේ ඉඳුල් කටගෑම

2010-10-15T11:25:00.001+03:00

පහුගිය ජනවාරි මාසෙ අපේ කැදැල්ලට පුංචි පුතෙක් එකතු වුන බව මම කලින් මේ අඩවියෙ සටහන් කලා.එක මෙතනි න් බලන්න පුලුවන්.ඊට පස්සෙ පුතාට නමක් දාන්න බ්ලොග් අවකාශයේ අය එකතු වුන හැටි මෙතනින් බලන්න පුලුවන්.ඊට පස්සෙ පුතා ගැන මුකුත් මේ බ්ලොග් අඩවියෙ සටහන් කලේ නෑ.නමුත් අද විශේෂ දවසක්.අද උදේ යෙදුන සුභ මොහොතකින් පුංචි පුතාට ඉඳුල් කටගෑවා.ඉතින් අද ගෙදර හැමෝටම සතුටු දවසක්.

ඉඳුල් කට ගෑමේදී දරුවාට තමන් කැමති දෙයක් තොරාගන්නට ඔහු වටා නොයෙක් දේවල් තබන සිරිතක් තියනවනෙ.ඉතින් පුංචි පුතා තොරගත්තෙ කොම්පියුටර් මවුස් එකක්.මම වැඩිපුර වෙලාවක් ඉන්නෙත් කොම්පියුටර් එක එක්ක තමයි.ගහේ කටු උල් කරන්න ඕනෙ නෑ කියලත් කියනවනෙ...

බුද්ධ චරිතයේ එන එක් සිද්ධියක් අභියෝගයට ලක් කළ ගීතයක් දන්නවද..?

2010-10-12T20:27:00.011+03:00

ආභියෝගයක් වුනත් මෙය අහිංසක විරුද්ධත්වයක්. බුදු දහමට කරපු අභියෝගයක් නම් නෙමෙයි. අපි දන්නවා බුදු රජානන් වහන්සේ කිඹුල්වත් පුරයට වැඩම කල අවස්ථාවේ සිදු වූ සිදුවීම්. මෙහි එක් අවස්ථාවක එනවා නන්ද කුමාරයා සම්බන්ධ සිද්ධියක්. නන්ද කුමාරයාගේ රාජාභිෂේකයත් විවාහ මංගල්‍යයත් නව රජ මැදුරකට ගෙවදීමත් එකම දිනක යොදාගෙන තිබුනා. ඊට පෙර දින බුදු රජානන් ප්‍රමුඛ මහා සංඝරත්නයට දානයක් පිරිනැමුනා.

දානය අවසානයේ බුදු රජානන් වහන්සේ නන්ද කුමාරයා අතට පත්‍රය ලබාදුන්නා. එසේ පාත්‍රය ලබාදුන් පසු පාත්‍රය ලබාගත් තැනැත්තා එය රැගෙන විහාරය තෙක් ගමන් කල යුතුයි. මේ ගමන අතරතුර සිදුවුන සිදුවීම අපි හැමෝම වගේ අහලා තියනවනෙ. මේ ගමන අතරතුර බුදුරජානන් වහන්සේ නන්ද කුමාරයට හේනක දැවී ගිය වැඳිරියක් මවා පෙන්වනු ලැබුවා. ඉන් පසුව තවුතිසා දෙවු ලොවට වැඩම කොට දිව්‍යාංගනාවන් පන්වනු ලැබුවා.

අපි දන්නවනෙ නන්ද කුමාරයා විවාහ වෙන්න හිටියෙ ජනපද කල්‍යාණි සමග බව. බුදු රජානන් වනසේ අර වෙලාවෙ නන්ද කුමාරයගෙන් ජනපද කල්‍යාණිය ගැන ඇසුවා. දිව්‍යාංගනවන දැක සිත් නෙත් පිනවාගෙන සිටි නන්ද කුමාරයා ජනපද කල්‍යාණි අතර මගදි දුටු දාච්ච වැඳිරිය වගේ කියල උත්තර දීපු බව තමයි සඳහන් වෙන්නෙ.

දැන් කට්ටිය මට බනිනවා අති මෙයා මේ බණ කතා කරනවා.මොකද්ද ඔය ගීතය කියල..එහෙනම් ඔන්න දැන් ගීතය ගැන කතා කරමුකො.දැන් කලෙ FM වල වැඩිපුර ඇහෙන්නෙ නැති වුනාට ඉතාම වටිනා ගීත රැසක් ගායනා කල වටිනා ගායකයෙක් තමා සෝමතිලක ජයමහ. එතුමා ගායනා කල සමහර ගීත එතුමාම රචනා කරල තියෙනවා. මේ ගීතයත් එවැනි ගීයක්.

බුදු පියානන් වැඳිරියක් මවා පෙන්වුවත් තමන් ආදරය කරන කාන්තාවට නිග්‍රහ කළ නොහැකි බව ඔහු සඳහන් කරනවා. ඒ වගේම සිත් පුරා සුරඟනන් දුටුවත් තමන් දන්නා හඳුනන කල්‍යාණිය සුරඟනන්ට වඩා තමන්ට සමීප බව ඔහු කියනවා. ඇසින් දුටු සුරඟනන්ට වඩා හදවති දුටු පෙම්වතිය තමන්ට වටින බවත් මේ ගීතයේ සඳහන් වෙනවා.

බොහෝ විට අප ගී රස විදින්නේ පදමාලාව ගැන ලොකු අවධානයක් නැතිව. පදමාලාව තෙරුම් ගනිමින් ගීතයක් රස විඳීමෙන් වැඩි රසයක් විඳගත් හැකි බව මගේ මතයයි. කලින් අහලා තිබුනත් මෙහි පදමාලවත් සමඟ නැවත් වතාවක් ගීතය රස විදින්න කියලා ආරාධනා කරනවා.

උවමනා අය ගීතය මෙත්නින් බාගන්න.
මෙතනින් ගීතය අහන්නත් පුලුවන්.

ගීතය රස විඳලා Comment එකක් දාලා යන්න අමතක කරන්න එපා හොඳද.....!

E-Bay එකෙන් ඔන්න අපිටත් බඩු ........!

2010-10-06T18:35:00.002+03:00

E-Bay එකෙන් බඩු ගත්තට මටනම් සම්පත් වෙබ් කාඩ් එකක් වත් නෑ.මගේ අසල්වැසි මිත්‍රයා චින්තකගෙ සම්පත් වෙබ් කාඩ් එකෙන් තමයි මමත් මේක ගත්තෙ.මිනිහයි මමයි මේ ගැන විස්තර හොයගත්තු විදිය චින්තක මෙත්න ඉතා පැහැදිලිව විස්තර කරනවා.

දැන් ගත්තෙ මොනවද බලමුකො.මේක ගොඩක් අයට නොවැදගත් දෙයක්.ඒත් මටනම් ගොඩක් වැදගත් දෙයක්.මම විදේශ ගතවෙලා ඉඳල එද්දි LCD මොනිටර් එකක් ගෙනාවා. දැනට අවුරුද්දකට විතර කලින් වැස්ස දවසක් අකුනක් ගහලා ගෙදර ට්‍රිප් ස්විච් එක ඕෆ් උනා.එ වෙලාවෙ Computer එක වැඩ කරමිනුයි තිබුනෙ.පස්සෙ බලද්දි මොනිටර් එක වැඩ කරන්නෙ නෑ. පස්සෙ ඉලෙක්ට්‍රොනික් ගැන දැනුමක් තියන හිතවතෙකුට මේක පෙන්නුවා.එයා බලලා කීවා සෙනර් ඩයොඩ් දෙකක් පිච්චිලා.එක දැම්මම වැඩේ හරි කියලා.ඊට පස්සෙ මේ උපකරනය හැමතැනම හෙවුවා. හොයගන්න බැරි වුනා. පස්සෙ මේ ගැන Techකතා වලට ලීවා.එතනදි ලැබුන උත්තරෙත් E-Bay.

ඒත් ඒකට ක්‍රෙඩිට් කාඩ් නැති නිසා ඉවසන් හිටියා.ඔහොම ඉද්දි තමයි ධනිකගෙ ලිපි මාලාව කියවන්න ලැබුනෙ.ඒත් කොහොමහරි මගෙ අතින් ඒක ක්‍රියාත්මක උනේ නෑ. ඒත් මගේ මිත්‍රයා වැඩේට බැස්සට පස්සෙ මිනිහා උපරිම වේගෙන් ක්‍රියාත්මක උනා.ඒ ගමන්ම මගෙ වැඩෙත් කරගත්තා. මේ තියෙන්නෙ ඒ උපකරණයි.

තාම මොනිටර් එක හදාගන්න යන්න බැරි වුනා. ඒ වැඩේ කෙරෙන්නෙ සෙනසුරාදා.ලඟදිම සම්පත් වෙබ් කාඩ් එකක් ගන්න හිතාගෙන ඉන්නවා.කිසි බයක් සැකක් නැතුව E- Bay එකෙන් බඩු ගන්න කියල තමා අන්තිමට කියන්න තියෙන්නෙ.

කාලෙකට පස්සෙ...........

2010-08-29T19:29:00.002+03:00

මාස තුනකින් විතර බ්ලොග් එක ලියන්න බැරි වුනා. අන්තිමට ලීවෙ සනත් ගැන.වැඩි පිරිසකගෙ අදහස සනත් දිගටම දේශපාලනය කරනවනම් හොඳයි කියන එක.කොහොම හරි මේ දවස් වල සනත් ගැන කිසි ආරංචියක් නෑ.ඒ අතරේ මුරලි ඉතාමත් විශිෂ්ඨ විදියට ටෙස්ට් ක්‍රිකට් ක්‍රීඩාවෙන් සමු ගත්තා.ඒ ගැන බ්ලොග් එකක් ලියන්න හිතාගෙන හිටියත් ඉඩක් හම්බවුනේ නෑ.දැන් අලුත්ම මාතෘකාව රන්දිව්.. කොහොමහරි තුන් කොන් තරගාවලිය නම් ජය ගන්න ලැබුනා...
ඒ අන්තිම පෝස්ට් එක ගැන.. රැකියව කරන ස්ථානය මාරු කරන්න වුන නිසා බ්ලොග් ලිවිල්ල තවත් අතපසු වුනා.මොකද කලින් වැඩ කරපු තැනට වඩා දැන් වැඩකරන තැන ටිකක් දුර නිසා.ගෙදර ඉන්න තිබුන කාලෙන් පැය කීපයක් දැන් බස් එකේ ගතකරන්න වෙලා.කොහොම නමුත් බ්ලොග් එක ලියන එක නම් නවත්තන්නෙ නෑ.ඉඩක් ලැබෙන විදියට මොනවහරි ලියන්න හිතන් ඉන්නවා.මම බ්ලොග් ලියන්න පටන් ගනිද්දි සිංහල බ්ලොග් කරුවන්ගෙ සන්සදේ හිටියෙ දෙසිය ගනනක්. දැන් දාහත් පැනලා.ඒ නිසා ලියන්න වෙලාවක් නෑ කියවන්න ගියාම.කොහොම නමුත් මේ තරමට මේ දේවල් දියුනු වෙන එක සතුටට කරුණක්.කොහොම නමුත් ඉක්මනින්ම අයෙ පෝස්ට් එකක් දාන්න හිතන් ඉන්නවා..දැනට නවතින්නම්.

සනාගේ අනාගතය.......?

2010-05-30T14:23:00.002+03:00

සනත් ජයසූරියගේ ක්‍රීඩා දිවිය ගැන දැන් ලොකු සාකච්ඡාවක් ඇතිවී තිබේ.පිරිසක් තව දුරටත් ඔහු ක්‍රීඩා කරනු දැකීමට කැමතිය.තව පිරිසක් ඔහු දැන් ක්‍රීඩාවෙන් සමුගත්යුතු කාලය පැමිණ ඇති බව කියති.
ශ්‍රි ලාංකික ක්‍රිකට් ක්‍රීඩාවට ඔහු කර ඇති සේවය කෙසේවත් අවතක්සේරු නොකළ යුතුය.එමෙන්ම නිසි අවස්ථාව එළඹි කල ක්‍රීඩාවෙන් සමුගෙන නවකයන්ට අවස්ථාව ලබාදීමද කළ යුතු දෙයකි.
මීලඟ ලෝක කුසලාන තරඟාවලිය තෙක් තමන් ක්‍රීඩා කරනු දැකීම ජනතා අපේක්ෂාව බව සනත් ජයසූරිය පැවසූ බව අප පුවත්පත්වලින් දුටුවෙමු.
මාතර දිස්ත්‍රික්කයෙන් වැඩිම මනාප ලැබුනේ දේශපාලනයටද නොයෙසේ නම් ක්‍රිකට් ක්‍රීඩා කිරීමටදැයි මම නොදනිමි.
කෙසේ වෙතත් මේ පිළිබඳව බ්ලොග් අවකාශයේ කැමත්ත කුමක්දැයි විමසන්නට මම සිතුවෙමි.එබවින් සනත් ජයසූරියගේ අනාගත තීරනය කුමක් විය යුතුදැයි ඔබේ අදහස දක්වන මෙන් මම ඉල්ලා සිටිමි.( දකුණු පස තීරුව තුල එය ඇතුලත්ව ඇත)

සුභ අලුත් අවුරුද්දක් වේවා

2010-04-13T19:25:00.002+03:00

ලබන්නාවූ නව වසර බ්ලොග් ලියන කියවන සියලු දෙනා ඇතුලු ශ්‍රී ලංකා වාසී සියලු දෙනාටම සියලු පැතුම් ඉටුවන සුභ නව වසරක් වේවා..

ප්‍රියන්ත කරුණාරත්න
ඉනෝෂා දිල්හානි
ගීනුල දුල්මිත්

හත් වලාමෙ වෙච්ච දේට මක් කොරන්නද..?

2010-04-02T14:22:00.002+03:00

එක එක දේවල් නිසා සෑහෙන දවසකින් බ්ලොග් එක ලියන්න බැරි වුනා..මොනවා හරි ලියන්නම් කියලා හිත හිත ඉද්දි මට වෙච්ච අවාසනාවන්ත සිද්ධිය බ්ලොග් එකේ නොලියා වෙන මොකේ ලියන්නද මං..
පායලා පායලා තිබිලා පහුගිය දවස් වල අපිටත් වැස්සනෙ.. පහුගිය බ්‍රහස්පතින්දා හවස හොඳටම වැස්සා..මම ඉතින් වැඩනේ.. මම හවස ගෙදර ගිහින් බලද්දි ඉන්ටර්නෙට් වැඩ නෑ.රවුටර් එක් පවර් වැඩ.. ADSL LED එක බ්ලින්ක් වෙනවා.LAN LED එක වැඩ කරන්නෙම නෑ..
අවසානයෙයෙදි හොයාගත්තා වෙච්චදේ.. ( වැස්ස වෙලාවෙ අකුණු ගහලා ට්‍රිප් එකත් ඕෆ් උනා කියලා ගෙදර උන්දැ කීවා ) දැන් හරි සනීපයි. රවුටරේ වල කජ්ජ ගහලා.
ඒ විතරක් නම් මදෑ ඔන් බෝර්ඩ් නෙට්වර්ක් ඇඩප්ටරයත් වැඩ නෑ.දැන් මොකේද දන් වලඳන්නෙ කීවලු...
එහෙන් මෙහෙන් අවුස්සලා නෙට්වර්ක් කාඩ් එකක් හොයගෙන ගහලා එකනම් හදාගත්තා. ඒත් රවුටරේට මොනවා කරන්නද..? මේ වගේ ප්‍රශ්න වලට වොරන්ටියෙන් සහයක් ගන්න බෑනෙ..අවුරුද්දත් කිට්ටු කිට්ටු කියලා සල්ලි ඕනෙම කරන වෙලාවෙ තව රවුටරයකුත් ගන්න වුනාම හරිම සනීපයි..මේ ජංජාලෙට පුරුදුවෙලා ඒක නැතුව ඉන්නත් බෑ.වැඩකරන තැන ඉන්ටර්නෙට් තියන නිසා මේ ටිකවත් ලියගත්තා..අදට නවතින්නම් ලඟදිම එනවා....

මගේ ෆොටෝ බ්ලොග් එක

2010-02-12T20:59:00.004+03:00

ටික කාලෙකට උඩදි මම ෆොටෝ බ්ලොග් එකක් හැදුවා.එත් මට ඒකෙ මොකක්දෝ අවුලක් තිබුනා.හැමදාම අවුල තියගෙන ඉන්න බෑනෙ. ඔන්න මම ඒක හිතට හරියන විදියට වෙනස් කලා.ෆොටෝ ගැන මගෙ අදහසුත් ලීවා.සිංහල අන්තර්ගතයක් තියන නිසා සින්ඩියටත් ඉල්ලුම් කලා.සියලු දෙනාටම ආරාධනා කරනවා පොඩ්ඩක් ඇවිත් බලලා ගුණ දොස් කියලා යන්න කියලා.ඒක මට ලොකු ශක්තියක්.මොකද මම ඇම්මට ෆොටෝ ගත්තට වෘත්තීය ඡායාරූප ශිල්පියෙක් නෙමෙයි.

http://priyantha-photo.blogspot.com/

එහෙන් මෙහෙන් පොඩ්ඩ පොඩ්ඩ..

2010-02-08T18:05:00.005+03:00

මාසෙකින් විතර මුකුත් ලියන්නත් බැරි වුනා.පුතු පැටියා ලැබිලා අදට හරියටම මාසයයි.ඒ ගැන නම් හරිම සතුටුයි.
පහුගිය කාලෙ ඡන්ද උනුසුමනෙ.ඒ ගන ලියවුන බ්ලොග් බලලම මට බ්ලොග් ලියන්න වෙලාවක් නැති වුනා.මහ මැතිවරණයත් ලඟ එන නිසා තව කියවන්න නම් ලැබෙයි ගොඩාක් දේවල්..තර්කානුකූලව තම මතය සනාත කරනවා වෙනුවට හුඟක් අය ලීවෙ අවලාද.ඒකට ඉතින් වරදක් කියන්න බෑ.එකිනෙකාට මේ දේවල් දැනෙන විදිය වෙනස් වෙන්න පුලුවන්නෙ. කොහොම උනත් රූපවාහිණී නාලිකා වල දේශපාලන සංවද වගේම බ්ලොග්වල ලියවුන සංවාදත් හරිම රසවත්.

ඔය ජර මර අස්සෙම මම උබුන්ටු දැම්මා.මම කාලයක් තිස්සෙ xp සහ විස්ටා එකට පාවිච්චි කලා.ලඟදි මම විස්ටා වෙනුවට windows 7 දැම්මා.ඒ ගැන බ්ලොග් එකකුත් ලීවා.windows 7 කොච්චර අල්ලලා ගියාද කියතොත් xp වලට යන්න උනේම නෑ.ඒ නිසා මම xp වලින් සමුගන්න හිතුවා.ඊට පස්සෙ 7 දැම්මා.ඊටත් පස්සෙ 7 එක්කම උබුන්ටුත් දාගත්තා.දැන් පොඩ්ඩ පොඩ්ඩ අල්ලගෙන යනවා.පරිඝනක ගැන කිසිම පාඨමාලාවක් හදාරලා නැති මට මේ වැඩේ නම් ටිකක් අමාරුයි.අවුලක් වුනොත් උදවු ගන්න බ්ලොග් ලියන අය ඉන්නවනෙ.

ඔය අස්සෙම මන් ලියපු බ්ලොග් එකක් පත්තෙර් ගියා කියලා ආරංචියක් ආවා.අනේ තාම පත්තෙරේ හොයගෙන බලන්න නම් බැරි වුනා.සිංහල බ්ලොග් කරුවන්ගේ සංසදේ මේ ගැන සාකච්ඡාවක් ගිය බව නම් මතකයි.කොහොම හරි එහෙම උනානම් ෆිට් තමයි.මේ වගේ වැඩ වලින් හමෝගෙම උනන්දුව වැඩි වෙනවා.

අදට නවතිනවා..අයෙ ඉක්මනට එනවා...

පොඩ්ඩට නමක්....?

2010-01-10T17:21:00.003+03:00

බ්ලොග් ලියන කියවන අයගෙන් පොඩි උදවුවක් ඉල්ලන්නයි යන්නෙ.මීට කලින් දාපු පොස්ට් එකේ කිවුවනෙ පුතෙක් හම්බුනා කියලා.දැන් ලස්සන නමක් දාගන්න ඕනනෙ. උපන් නැකත අනුව ලැබුන විස්තරේ මෙන්න මේක..

1. සිත නැකත, 3 පාදය, රාක්ෂ ගණ ---> ර - රා
2. කුම්භ ලග්නය ---> ප - බ - ම
3 .සිකුරදා දවස ---> ච - ජ

1 පේලිය වඩාත් හොඳයි.
2-3 පෙළි වල අකුරුවලට ඉස්පිලි පාපිලි වෙනස් වූවාට කමක් නැත.

මේ විස්තර අනුව නමක් යෝජනා කරන්න පුලුවන්නම් ගොඩාක් අගය කරනවා..
සීසර් සැත්කමකින් දරුවා ලැබුන නිසා තවමත් දරුවත් බිරිඳත් රෝහලෙ.දෙදෙනාම සනීපෙන්.මමත් ගොඩාක් සතුටින් ඉන්නෙ. කලින් පෝස්ට් එකට ලැබුන කමෙන්ට් වලට ගොඩක් ෆිට්.ඒ නිසා මෙතනදිත් ඔයාලගෙ හෘදයාංගම අදහස් බ්ලපොරොත්තු වෙනවා.

ජීවිතේ වටිනාම දවස..

2010-01-09T14:42:00.003+03:00

ගෙවුන ජීවිත කාලය තුල මට ඉතාම වැදගත් දවස් ආවා.ඒ හැමදාකම මට හිතුනා ජීවිතේ වටිනාම දවස ඒ දවස කියලා.කලය ගෙවිලා තව දවසක් ආවා.ඒ ඊයෙ දවස ( 2010 - 01 - 08 ) මට දැන් හිතෙනවා මගෙ ජීවිතේ වැදගත්ම දවස ඊයෙ කියලා..එකට හේතුව මම කියන්නම්.. ඒත් ඊට කලින් ඊයෙ දවස ගැන මගෙ මිත්‍රයෙක් මට එවපු ඊ මේල් එක පොඩ්ඩක් බලලා ඉන්න කියලා ආරාධනා කරනවා.ඒකෙ මෙහෙම තිබුනා....

" උඹ තාත්තෙක් උනා නෙද? මම දන්නව මම තාත්තෙක් උන දවසෙ මට දනුන හැගීම්ම උඹටත් දැනුන බව. ඒ වගෙම තමා ඒ මොහොතට කලින් හිතට එන බය. අනිවර්යයි උඹත් ඒ අත්දැකීම විදින්න ඇති. මේක අමුතු ලෝකයක් බන්. පුදුම විදියට අපි දැක්කෙවත්, දන්නෙවත් නැති අය අපේ ජීවිත තුලට ඇවිත් අපේ හදවත හොරා ගන්නවා. ඉන් පස්සෙ අපේ මුලු ලෝකයම එයාල වෙනවා. මේක තවත් කඩඉමක්. මම කලින් එතනට අවා. උඹ අද ආවා. ඉතින් මචන් අපි දෙන්නම දැන් තාත්තල. මම උඹට හදවතින්ම සුභ පතනවා. "

දැන් කාරණාව පැහැදිලි ඇතිනෙ.කියාගන්න බැරි හැඟීම් සමුදායකින් හිත පිරිලා තියන මේ වෙලාවෙ මට ගොඩක් දේවල් ලියාගන්න බෑ. දැනට නවතින්නම්.

පින් සිද්දවෙයි මට කියන්න...!

2010-01-03T18:49:00.004+03:00

ජනවාරි පළමුවෙනිදා උදේම මට වෙච්ච් දෙයක් කියන්නයි යන්නෙ..ඊට කලින් කියන්න ඔනෙ මම පරිඝනක මෘදුකාංග හෝ දෘඩකාංග ගැන කිසිම විද්‍යානුකූල අධ්‍යාපනයක් ලබපු කෙනෙක් නෙමෙයි.මගේම තියන ඇම්මට එහෙන් මෙහෙන් අහුලගෙන පොඩ්ඩ පොඩ්ඩ තනියම ඉගෙනගත්ත කෙනෙක් මම.

ඔන්න කතාව...මන් උදේම Computer එක ඔන් කලා..ඒත් මොනිටර් එකට කිසිම දෙයක් ආවෙ නෑ.යස අගේට ක්‍රියාකල යන්තරේ නතර වුනාම පිස්සු හැදෙනවනෙ..දෙපාරක් විතර OFF කරලා නැවත ON කලත් වැඩක් වුනේ නෑ.ඊට පස්සේ සේරම පැත්තක දාලා වැඩට ගියා.හවස පටන් ගත්තා මෙහෙයුම.මම දැනගෙන හිටියා ඩිස්ප්ලේ එක නොයෙන්න එක හෙතුවක් කියලා RAM වල තියන ප්‍රශ්ණ.මම මුලින් RAM කාර්ඩ් දෙක ගලවලා එක එක මරුවෙන් මාරුවට ගහලා බැලුවා.වැඩක් උනේ නෑ.

ඊට පස්සෙ සිග්නල් කේබල් එක ග්‍රැෆික් කාර්ඩ් එකෙන් ගලවලා ඔන් බෝර්ඩ් ගහලා බැලුවා.හරි ගියෙ නෑ.හාර්ඩ් ඩිස්ක් DVD ROM සේරම ගලවලා අයෙ බැලුවා අඩුගානෙ මදර් බෝර්ඩ් එකවත් පෙන්නනවද කියලා.එත් නෑ.මන් හිතුවා මදර් බෝර්ඩ් එකට කෙලවිලා කියලා.ඒක මාරුකරලා බලන්න විදියක් මට නෑනෙ.හදන තැනකට ගෙනියන්න හිතලා මදර් බෝර්ඩ් එක ගලවලා එලියට ගත්තා.එක කරන්නත් වෙන්නෙ හෙටනෙ.එ නිසා හිත හදාගෙන නිදාගත්තා.

ඊයෙ දෙවනිදා..ඒ කියන්නෙ සෙනසුරාදා.මගෙ නිවාඩු දවස.මේ ප්‍රස්නෙ විසඳගන්න හොඳම දවස.ඒත් යන්න කලින් ආයෙම උත්සහ කරලා බලන්න මට හිතුනා.මදර් බෝර්ඩ් එක මේසෙ උඩ තියලා පවර් සප්ල්යි එකත් මෙසෙ උඩ තියලා දෙක සම්බන්ද කාලා.සිග්නල් කේබල් එක ඔන් බොර්ඩ්ම ගහලා කී බෝර්ඩ් මවුස් සම්බන්ද කලා.පවර් ස්විච් එකට අදාල පින් දෙකට ටෙස්ටරයක් ගාවලා ඔන් කලා.සුපුරුදු පරිදි මොනිටරේටනම් මුකුත් ආවෙ නෑ.ආ කියන්න බැරි වුනා.නංගිගෙ Computer එක මගෙ මොනිටරේට ගහලා බැලුවා.මොනිටරේ අවුලක් නෑ.ඒක කලේ පළවෙනි දවසෙම...

මම අහලාතිබුනා RAM අප්සෙට් නම් බීෆ් කෝර්ඩ් එකෙන් දැනගන්න පුලුවන් කියලා.ඒත් මේ මදර් බෝඩ් එකේ ස්පීකර් එකක් නෑ.පරන ලට්ට පට්ට අවුස්සලා හොයගත්තා මදර් බෝර්ඩ් එකට ප්ලග් කරන්න පුලුවන් ස්පීකර් එකක්.එක ගහලා RAM දෙකම ගලවලා දාලා අයෙ ඔන් කලා..ආ.. ඔය එන්නෙ සද්දෙ නියමෙට..ඒ කියන්නෙ මදර් බෝර්ඩ් එක දන්නවා RAM නෑ කියලා. ඒ නිසා මට හිතුනා මදර් බෝර්ඩ් එකෙ අවුලක් නැද්ද දන්නෙත් නෑ කියලා. කෝකටත් එක RAM එකක් ගහලා ඔන් කලා.මෙන්න යකෝ ඩිස්ප්ලේ එක අවා.ඔන්න දැන් හිතට පොඩි සහනයක් ආවා. අනිත් RAM එකත් ගහලා බැලුවා.එත් වැඩ.ඒ කියන්නෙ RAM හොඳා.ග්‍රැෆික් කාර්ඩ් එකටත් ගහලා බැලුවා.එත් වැඩ.එකෙ අවුලක් තිබිලත් නෑ.ඊට පස්සෙ හාර්ඩ් ඩිස්ක් එක ගහලා ඔන් කලා.සෝක් එකට බූට් වෙලා Windows 7 ඇරුනා.ඊටපස්සෙ සේරම කෑලි ටික ගලවලා.හොඳට දූවිලි පිහලා සේරම අමුනලා ගත්තා.දැන් නම් කිසි හෙනයක් නෑ.

පින් සිද්දවෙයි දන්න කෙනෙක් මට කියන්න මේකෙ තිබුන ලෙඩේ මොකක්ද….?

2009 අවසන්....! 2010......?

2009-12-31T17:02:00.010+03:00

2009 වසර අවසන් වෙලා 2010 වසර උදාවෙන්න තව පැය කීපයයි.මේ විදියට වසර කීපයක් අපි පහු කලාද..? ඒ හැම එකකටම වඩා මේ අවුරුද්ද සුවිශේෂයි.පෞද්ගලිකව මගෙ පැත්ත බැලුවොත් වසර ආරම්භයෙදිම රට රස්සාවෙන් මිදිලා ලංකාවට එන්න අවස්ථාව උදාකරගන්න පුලුවන් වුනා.ඒ වගේම මගෙ විවාහය සිදුවුනෙත් මේ ගෙවීයන අවුරුද්දෙ මාර්තු මාසෙ.තවත් ඉදිරියට ගියොත් මගෙ දයාබර බිරිඳ දැන් දරු ප්‍රසූතියකට සූදානම් වෙමින් ඉන්නවා.ඒ අතින් බැලුවම මේ වසර මගෙ ජීවිතයට ඉතාමත් වැදගත්.

පොදුවේ රට ගැන හිතුවොත් අවුරුදු තිස් ගණ්නක් තිස්සෙ ඇදිලා ගිය LTTE ත්‍රස්තවාදය නිමාවෙලා තියනවා.උපන්දා සිට අහන්න දකින්න විඳින්න ලැබුන මේ කරදරයට මතු පරපුරට මුහුනදෙන්න වෙන්නැති එකම ලොකු දෙයක්.ඒ තුලින් ලබන්නාවු නව වසරත් සමඟ රටට හොඳ අනාගතයක් උදාවේවි යැයි මම සිතුවා.එත් වසර අවසන් වෙන්නටත් පළමුව සියලුම දේශපාලන පක්ෂ කා කොටාගනිමින් නටන නාඩගම දැක්කම අනේ අපොයි කියලා හිතෙනවා.පක්ෂ විපක්ෂ ලෙස රටේ අනාගතය වෙනුවෙන් හරවත් සංවාදයක යෙදෙනවා වෙනුවට අද දවසේ මොවුන් මේ කරන්නෙ කුමක්ද..?

වචනයෙන් විස්තර නොහැකි ජුගුප්සාජනක දේ කියමින්, කරමින්, විලි ලැජ්ජානැති විදියට හැසිරෙමින්, මොවුන් මේ පොර කන්නේ කුමකටද..?

මේ රට සුරපුරක් කරන්නලු....!
ජනතාව සුඛිත මුදිත කරන්නලු....!
අඳෝමැයි.....

සියලු අලකලංචි මැද කලය ගෙවීයනු ඇත.නව වසරක් උදාවනු ඇත.ලබන්නාවූ නව වසරේ බ්ලොග් කියවන ලියන සැමටත්, රටවැසි සියලු දෙනාටමත්, යහපතක්ම වේවායි මම හදවතින්ම සුභ පතමි.

ආත්මාර්ථකාමී ඡායාරූප ශිල්පියා

2009-12-26T15:49:00.005+03:00

බොහෝ විට ඡායාරූප ශිල්පීන් ඡායාරූපයට නගන්නෙ අප අවට පරිසරය සහ අප අවට සිටින පුද්ගලයන්.තමන්ව ඡායාරූපයකට නගාගන්න උවමනානම් අපි වෙන කෙනෙක්ගෙ සහය පතනවා.තමන්ව තමන්ටම ඡායාරූපයකට නගාගන්න කෙනෙක්ට හිතෙන්නෙ කලාතුරකින්.එක අතකට ඒක ආත්මර්ථකාමී අදහසක්.මගෙ පරිඝනකය අවුස්සද්දි මට ඒ විදියෙ ඡායාරූපයක් හමුවුනා.බලන්නකො කොහොමද කියලා. අවුරුදු හතකට පමණ පෙර මට මෙහෙම එකක් ගන්න හිතුනෙ මොකද කියලා මට දැන් මතක නෑ.ඩිජිටල් කැමරාවක් අතින්වත් අල්ලල නොතිබුන එ කාලෙ ෆිල්ම් රෝල් වලට සල්ලි වියදම් කර කර කරලතියන දේවල් දැක්කම හිනත් යනවා.ඒත් ඔය කැමරාවෙන් සෑහෙන දෙයක් ඉගෙනගත්තා.එකත් ලොකු දෙයක්නෙ.

ADSL ජන්ජාලෙ

2009-12-13T18:13:00.004+03:00

කාලයක් තටම තටම ඉඳල ඔන්න මමත් මටම කියල ගෙදරටම අන්ත‍ර්ජාල සම්බන්දතාවය ගත්තා.කාලයක් දුරු රටක තනිවෙලා ඉද්දි අන්තර්ජාලෙට ඇබ්බැහි වුන මට එකෙන් මිදෙන්නම බෑ දැන්.දැන් කලෙ හැටියට වෙන දහ ජරාවකට පුරුදුවෙනවට වඩා මෙක හොඳයිනෙ.
මෙහෙයුම පටන් ගනිද්දි මට තිබුනෙ සිටි ලින්ක් ෆෝන් එකක්.මුලින්ම ටෙලිෆෝන් ලයින් එක ඉල්ලුවා.ඔන්න සල්ලි බඳින්න කීවා.එසැනින් සල්ලි බැන්දා.සතියක් යන්න කලින් ඇවිල්ලා හයි කරල ගියෙ නැද්ද ෆෝන් එක.ඊට දවස් තුනකට පස්සෙ සම්බන්දතාවයත් දුන්නෙ නැද්ද.එදා හවසම කතා කරලා අහුවා කෝ මගෙ අන්තර්ජාලෙ කියල.දවස් තුන යද්දි දෙනවා කීවා.මේ වෙනකොට මම මොඩම් එක එහෙම ගෙනල්ලා දතකට මැදගෙන හිටියෙ.ඉවසන් ඉන්න බැරි තැන මන් දවස් දෙකෙන් ආයෙ කතා කරලා බැලුවා.දැන් අන්තර්ජාලය දීලා තියෙන්නෙ කියල කීවා.ඔන්න මන් වැඩේට බැස්සා.වැඩේ ගොඩ.රෑ ටොරන්ට් එකක් බෑවෙන්න දාලා නිදාගත්නා.උදේ බලද්දි ටොරන්ට් එක 97%. ඒත් ජන්ජාලෙ හිටලා.ADSL වලට අදාල LED එක බ්ලින්ක් වෙනවා.දන්න විදියට බැලුවා හරි ගියෙම නෑනෙ.අයෙ කතා කලා අදාල අංශ වලට පැය 2-3 යද්දි අවෙ නැද්ද ගෙදරටම.එයලා බලල කීවා මොඩම් එක අප්සෙට් කියලා.පහුවදාම ගිහින් මොඩම් එක දීලා රවුටර් එකක් ඉල්ලුවා.රවුටරේ ගනන් වැඩි නිසා වැඩිපුර මුදල අරන් ඔන්න එකත් දුන්නා.ගෙදර ආවා.රවුට‍ර් එක සම්බන්ද කලා.දැන් කිසි හෙනයක් නෑ. මම ගත්තෙ 512 සීමා රහිත සම්බන්දතාවය (බාන බෑවිල්ලට මොන සීමාවල්ද )ස්පීඩ් ටෙස්ට් කරපු හැම වෙලේම 512ට වඩා තිබුනා.දැන් නම් මාර සනීපයි. (බිල එනකල් )

ඊට වඩා ආතල් qsFOX ඇඩෝන් එක.ඒක නම් පට්ට.හදපු අයට තව තවත් මේ වගේ දේවල් කරන්නට ශක්තිය ලැබෙන්න කියලා හදවතිනම සුභ පතනවා.

මට තරු පෙනුනි.

2009-12-07T06:00:00.004+03:00

රිමෝට් එක අතේ තියන වෙලවට හේතුවක් ඇතුව හෝ නැතුව ටී.වී එකේ චැන්ල් මාරු කරන එක දැන් කලෙ ගොඩක් අයට තියන සාමාන්‍ය ලෙඩක්නෙ. ඔය ලෙඩෙ මට තදේටම තියනවා.ඔන්න ඕක කරන්න ගිහින් තමා ඊයෙ රෑ මට තරු පෙනුනෙ.

එකක සුපර් ස්ටාර්ය. තව එකක මෙගා ස්ටාර්ය. තව එකක ඩ්‍රීම් ස්ටාර් සහ ලිට්ල් ස්ටාර්ය. තව එකක ශ්‍රි ලාංකික ජීවිතය සොයයි. නම වෙනස් උනාට කරිය එකකි. එකම රැයක සියලුම මාධ්‍ය අයතන මට තරු පෙන්නුවේය. ශ්‍රි ලාංකික කලා කෙත අස්වද්දන්නට සියලු මාධ්‍ය ආයතන පොරකති.

මේ ජර මර අස්සෙ තරු විසිවන තවත් තරු පොරයකුත් පේන්නට තිබුනි. ඒ අපේ මේ පුංචි රට සුර පුරයක් කරන්නට පොරකන දේශපාලක තුමන්ලාගේ තරු පොරයයි.

මට තරු පෙනී ඇස් නිලංකාර විය.

ඔන්න මටත් හතේ හත.

2009-11-10T05:36:00.006+03:00

හතේ හත කීවට නරකක් නෙමේ.පොඩි වෙනසක්. ඔන්න මටත් Windows 7 දාලා බලන්න රුදාවක් තිබුනා කලෙක ඉඳලා.ඔන්න දැන් ඒ අමාරුව හොඳයි.තාමනම් හරිම මටසිලුටුයි. සුන්ම්‍යයි. ලඟදි ගෙනා මනමාලි වගේ. එකට වැඩ කරගෙන යද්දිනෙ ඉතින් ප්‍රස්න එන්නෙ. Drivers වල නම තාම ගැටලුවක් ආවෙ නෑ. Scanner එකත් Install කලා.

ඔන්න බලන්නකො මගෙ Desktop එකේ හැඩ වැඩ.

Windows Mesia Senter එකට මගේ MP3 තොගය සම්බන්ද කරලා අමරදේව මහත්තයගෙ සින්දුවක් අහද්දි පෙනුනෙ මේ විදියට.

ඔයාලටත් 7 වැදුන විදිය අපිටත් කියන්න....

දිය කිඳුරෙක්

2009-10-07T06:25:00.003+03:00

ටික දවසකින් බ්ලොග් පෝස්ට් එකක් දාන්නත් බැරි උනානෙ.අද අයෙත් විවාදාත්මක ඡායාරූප ටිකක් හම්බුනා.දන්න කෙනෙක් අපිට පැහැදිලි කරලා දෙන්න මේ දිය කිඳුරෙක්මද කියලා.

වලහා ගැන ප්‍රස්නයක්

2009-09-13T09:51:00.002+03:00

තියන ප්‍රස්න මදිවට තව වලස්සුන්ගේ ප්‍රස්නත් ලියනවා කියලා මට බනින්න එහෙම එපා.මේක සරල බුද්ධි පරීක්ෂනයක්.උත්සහ කරලා බලන්න උත්තර දෙන්න පුලුවන්ද කියලා.
ප්‍රස්නෙ මේකයි. එක වලහෙක් තමන් ඉන්න තැන ඉඳන් කි.මි. 1 ක් දකුණට ගමන් කරනවා.ඊට පස්සේ එතන ඉඳන් කි.මි. 1 ක් නැගෙනහිරට ගමන් කරනවා.ඊටත් පස්සෙ උතුරට කි.මි. 1 ක් ගමන් කරනවා.මගෙ ප්‍රස්නෙ මේකයි.ඔය ගමන අවසානයේ වලහා නැවතත් මුලින් හිට්පු තැනටම ආවානම් මේ වලහගෙ පාට මොකක්ද..?
බැලූ බැල්මට විහිලුවක් වගේ පෙනුනට මෙකට ඉතාම තර්කානුකූල උත්තරයක් තියනවා.එහෙනම් උත්සහ කරලා බලන්න.

ALL IN ONE

2009-09-11T08:24:00.002+03:00

කාලෙකට පෙර යාලුවෙක් මට එවපු e mail එකක සිත් ඇදගන්නාසුලු පිංතූරයක් තිබුනා.ගතවුන කාලයේ ලෝක ඉතිහාසය තුළ තමන්ගෙ නම රන් අකුරින් ලියාතැබූ පුද්ගලයන් විශාල ප්‍රමාණයක් එකම තැනකට එකතු කරලා තිබුනා.ලොව පතල දාර්ශනිකයන්, විද්වතුන්, දේශපාලකයන්, කලාකරුවන්, ක්‍රීඩකයන් සියලුදෙනාම එකම තැනක.බලන්න මෙහි ඔබ හඳුනන අය කී දෙනෙක් මෙහි ඉන්නවද කියලා. හිතන්න මොවුන් අද අප ජීවත්වන ලෝකය නිර්මාණය වීමට කෙතරම් බලපෑමක් කලාද කියලා.පහල පිංතූරෙට ක්ලික් කරලා විශාල කරලම බලන්න.මම නම් මෙක ප්‍රින්ට් කරලා රමු කරලා බිත්තියෙ ගැහුවා.මොකද හිතෙන්නෙ කියලා ලියල යන්න අමතක කරන්න එපා හොඳද...

ඡායාරූප දෙකක්

2009-09-09T05:21:00.004+03:00

මා ඡායාරූපකරණයට කෙතරම් ඇලුම් කලත් ඒ සඳහා කාලය වෙන්කර ගැනීමට මා නොපෙළඹෙන්නේ මන්දැයි මටම ගැටලුවකි.ඊටත් වඩා ගැටලුව වන්නේ කාලයක් තිස්සේ බ්ලොග් කරණයේ යෙදුනත් මගේ ඡායාරූප මෙම බ්ලොග් අඩවියට එක් කිරීමට නොපෙළඹීමයි.කෙසේ වෙතත් අද දින මගේ ඡායාරූප දෙකක් ඉදිරිපත් කිරීමට මම සිතුවෙමි.මේ ඡායාරූප පිළිබඳව ඔබගේ නොමසුරු අදහස්, උදහස්,යෝජනා,චෝදනා මගේ දියුනුවට බොහෝ උපකාරීවන බව කරුණාවෙන් මතක්කරමි.

ලියතඹරා... තවදුරටත්...!

2009-08-31T13:20:00.002+03:00

දැන් වැඩේ නැගලා යනවනෙ.මෙන්න එහෙනම් තවත් එකක්.මෙකෙ පොහොට්ටුත් තියනවා.හැබැයි මමත් මේ මල් හැබැහින් නම් දැක්කෙ නෑ.

ලියතඹරා මල

2009-08-30T13:08:00.004+03:00

මම නැට්ටුවා කියලා දාපු පොස්ට් එකට හොඳ ප්‍රතිචාර තිබුනා.මම දාපු ඒ Photo බලලා කෙනෙක් අහල තිබුනා ලියතඹරා මල ගැන.මෙන්න එහෙනම් ලියතඹරා මලත් බලාගන්න.ඇත්තටම මොකද හිතෙන්නෙ.තවුසන්ගෙත් දැහැන බිඳුනලු....!

නැට්ටුවා

2009-08-30T06:15:00.005+03:00

උවමනාවකට ලඟ ගෙදරකට ගිය වෙලාවෙ ඒ ගෙදර මල්ලිලා දෙන්නා මට ලස්සන මලක් පෙන්නුවා. ඉතින් ඒ මලේ සුන්දරත්වය සිංහල බ්ලොග් බලන අයත් එක්ක බෙදාගන්න මම හිතුවා.

මේ මලේ නම මම නම් හරියටම දන්නෙ නෑ. ඒ මල්ලිලා නම් කීවේ "නැට්ටුවා" කියලා. ඒක ඇත්තම නමද නැත්නම් මේ මලේ පෙනුම එ වගේ නිසා කීවද කියලත් හිතාගන්න බෑ. මේ ගැන වෙනත් තොරතුරු දන්න කෙනෙක් ඉන්නවනම් විස්තර ලියන්න.

පුංචි පවුල සහ වැලේ ගෙඩි

2009-08-28T05:29:00.004+03:00

ඉස්සර කාලෙ පැරැන්නො කීවෙ වැලේ ගෙඩි වැලට බර නෑ කියලා.එත් පස්සෙ කාලෙක පුංචි පවුල රත්තරන් වුනා.මේ පරිවර්තනය ගොන් කරත්තෙන් ගිය අපි මෝටර් රථයට මාරු වුනා වගේ ලෙහෙසිය පහසුව නිසා වුන දෙයක්ද? බටහිරයන් අපේ මේ ආකල්පය සැබවින්ම වෙනස් කලේ අපේ රටට ඔරොත්තු නොදෙන තරමින් අපේ රටේ ජනගහනය වැඩිවී එය අප රටේ දියුනුවට බාදාවක් වේවි යැයි සිතූ නිසාද? නැතිනම් ඕනෑම බටහිර ආකල්පයක් හිස් මුදුනින් බාරගන්නා අපේ මෝඩකමින් ප්ර යොජන ගෙන ශ්රිත ලාංකික ජාතිය විනාස කිරීමටද?එය තහවුරු වන්නේ ලෝකයේ වඳවන ජාතීන්ගේ ලෙඛනයට අපේ ජාතියද එක්වී ඇති බැවිනි. ඉතා සරල ලෙස හිතා බැලුවහොත් අද කාලයේ පවුල් කීයක නම් දරුවන් දෙදෙනෙකුට වඩා සිටීද? විවාහයකදී දෙදෙනෙකුගේ එකතුවෙන් දරුවන් දෙදෙනෙක් හෝ ඊට අඩුවෙන් ලැබේනම් පරම්පරා කිහිපයකදී සිදුවන දෙය සිතාගත හැකිය.

ඒ අතරම දරුවන් හැදීම පලනය කරන්නට බොහෝ අය පෙළඹෙන්නෙ අර්ථික හේතු පදනම් කරගෙන බව පිළිගතයුත්තකි.අද සමාජය තුල පවතින අතිශය කර්යබහුලභාවයද පිළිගත යුතු කරණයකි.බොහෝ කාන්තාවන් පෙරට වඩා අද කාලයේ රැකියාවල යෙදීම තවත් කරණයකි.මේ සියල්ල අප බටහිරකරණය වීම නිසා සිදුවූ දේවල් වුවත් දැන් අප සමජයට ආපසු හැරීමේ හැකියවක් නැත.
කෙසේ නමුත් බටහිරයන් විසින් කපා දුන් විනාශයේ මවත දිගේ ගමන් කරමින් සිටින බව අප අකමැත්තෙන් වුවත් පිළිගතයුතුද?

අලුත්ම තත්වෙ...!!

2009-08-25T15:29:00.000+03:00

මාස ගානකින් බ්ලොග් එකක් ලියන්න බැරි වුනා.මුලින්ම එකට හේතු කියන්න එපායැ.මම අවුරුදු 8ක් සෞදි අරබියෙ රැකියව කරලා පෙබරවාරි මාසෙ ලංකාවට ආවා.මර්තු මාසෙ යුග දිවියටත් එළඹුනා කියමුකො.ඊට පස්සෙ රැකියවට යන්න පටන් ගත්තා.දැන් Studio එකක Graphic Designer කෙනෙක් විදියට රැකියාව කරනවා.හැමදේම හොඳයි.එත් ඉතින් අන්තර්ජාලය නැතුව ඉන්න පුලුවන් කටද නේද? ගෙදර තියෙන්නෙ සිටි ලින්ක් ෆෝන් එකක්.දැන් ADSL ගන්න වෙහෙසෙනවා.තාම වැඩේ මඟ.ඔන්න ඔය අතරෙ මන් වැඩ කරන තැනට අන්තර්ජාලය ගත්තා.දැන් මටත් ආයතනයටත් හානියක් නොවෙන විදියට බ්ලොග් එක දිගටම ලියන්නයි කල්පනාව.කාලයක් නොලියපු නිසා මගෙ බ්ලොග් එක සින්ඩියෙන් අයින් කරලා තිබුනෙ.අයෙම ඉල්ලීමක් කරලා එකත් හදාගත්තා.ඒ වැඩ කටයුතු කරන අයටත් ගොඩක් ස්තුතියි.

දැක්ක ගමන් කන්න හිතෙනවා.

2008-11-01T09:21:00.002+03:00

පොල් වලු පුවක් වලු දැක පුරුදු ශ්‍රි ලාංකික අපිට රටඉඳි වල්ලක් කියන්නෙ විශේෂ දෙයක්.සෞදි අරබියෙදි ඒ අත්දැකීම විදගන්න අපිට අවස්ථාව ලැබුනා.ඇසුරුම් කරනලද රටඉඳි හැර ස්වභාවිකවම ගහෙන් කඩාගෙන රටඉඳි කන්නනම් මේ වගේ රටකටම එන්න වෙනවා.විවිධාකාරයේ රටඉඳි වර්ග රාශියක් මෙහිදී දකින්න ලැබෙනවා.මිළ ගනන් බැලුවොත් ඉතා සුලු මුදලක සිට විශාල මුදලක් දක්වා වෙනස්වන පරාසයක විවිධ රටඉඳි වර්ග දකින්න පුලුවන්.

උෂ්ණ දේශගුණය සහිත මාස කීපය තුලදි පමණක් ඵල දරන මේ රටඉඳි ගස් වල පොල් පුවක් වගේ වසර පුරාම ගෙඩි දකින්න ලැබෙන්නේ නැහැ.වායුගෝලීය ආර්ධතාවය ඉතාමත් උච්ච වන කාල වකවනුව තුලදී රටඉඳි ගෙඩිය පරිපූර්ණත්වයට පත්වනවා.

මෙම ඡායාරූපය එවන් සරුසාර රටඉඳි පොකුරක්.පෞද්ගලිකව මා ඡායාරූපකරණයට ඉතා ඇලුම් කලත් මේ ඡායාරූපය ගත්තෙ නම් මම නොවෙයි.මෙහි අයිතිකරු සුදත් හේමන්ත නම් වූ මාගේ මිත්‍රයෙක්.මෙම සටහන ලියන්නට මට සිතුනෙත් මේ අනගි ඡායාරූපය නිසාමයි.

මොකද මේක දැක්කම හිතෙන්නේ....?

දැක්ක ගමා..........න් කන්න හිතෙනවා නේද......?

උබුන්ටු ලැබුන හැටි

2008-10-30T08:59:00.003+03:00

මම විවෘත මෘදුකාංග ගැන සම්පූර්ණයෙන්ම දැනුවත් වුනේ සිංහල බ්ලොග් කරුවන්ගෙ සංසදයේ සාමාජික්යන්ගේ බ්ලොග් සටහන් කියවීමෙනුයි. ඒ අනුව මම උබුන්ටු සහ ෆෙඩෝරා යන මෙහෙයුම් පද්ධති දෙකම අන්තර්ජලය හරහා බාගත කලා. පරිඝණක කිහිපයක් මත ඒවා ස්ථාපනය කර්මින් ඒවා අත්හදාබලන්නට මගේ මිතුරන්ද සම්බන්ධ කරගත්තා. ඒ අනුව වඩාත් උනන්දු වූ මාගේ මිත්‍රයෙකු අන්තර්ජාලය හරහා උබුන්ටු ඇන්වුම් කලා. පසුගිය දිනක සෞදි අරාබියේ අපේ සේවා ස්ථානයට අප ඇන්වුම් කළ උබුන්ටු සංයුක්ත තැටිය ලැබුනා. මෙය ඉතාමත් සොම්නසට කාරණයක්.මෙම සටහන සෙනෙහසින් සිංහල බ්ලොග් කරුවන්ට තුති පුදකරන්නටයි.

අජන්ත මෙන්ඩිස්

2008-10-17T12:26:00.005+03:00

අද දවස වන විට මුලු ලෝකයේම ක්‍රිකට් ක්‍රීඩාවට ඇලුම් කරන පිරිස තුල සුවිශේෂී ක්‍රීඩකයෙක් බවට පත්ව සිටින අජන්ත මෙන්ඩිස් පිළිබඳව සටහනක් තැබීමට කලක සිට සිතා සිටියත් එයට අවස්ථාව උදාවුනේ නැහැ.
නමුත් අජන්ත නම් දිනෙන් දිනම ඔහු ගැන කතාකළයුතු යමක් අපට ලබාදෙනවා.ඔහු ලැබූ කඩුලු,සම්මාන සහතික,ත්‍යාග ගැන කතාකිරීම ප්‍රයෝජනයක් නැහැ.මොකද ඒ සියල්ල අපි ඉතා හොදින් දන්න්වා.

අර්ජුනලා අරවින්දලා ක්‍රීඩා කරන කලෙ අපිට තිබුන ප්‍රශ්ණයක් තමයි ඔවුන් ක්‍රීඩාවෙන් සමුගත්තම කවුද ඒ වෙනුවට ක්‍රීඩා කරන්නෙ කියන කාරනය.ඒවට උත්තර දෙන්න පිතිකරුවො කණ්ඩායමට ආවා.ඒත් ලොකුම ප්‍රශ්ණය වුනේ ලොව බිහිවුන හොඳම පන්දු යවන්නා වන මුත්තයියා මුරලිදරන් වෙනුවට අදේශකයක් අපට හෝ මුලු ලෝකයටම සොයාගන්න පුලුවන්ද කියන කරණයයි.

මෙන්න මෙතනදි තමයි ශ්‍රි ලාංකිකයො විදියට අපට ආඩම්බර වියහැකි අවස්ථාව උදාවුනේ.ලොව හොඳම පන්දු යවන්නගෙ කිරුළ තව දුරටත් රැක ගැනීමට ශ්‍රි ලාංකිකවට දැන් තවත් අවස්ථාවක් තියනවා.මට මතක විදියට එක් අවස්ථාවක මුරලිම ප්‍රකාශ කලා තමන්ගේ අරම්භක යුගය මෙතරම් සාර්ථක නොවුන බව.මේ අයුරින්ම දක්ෂ ලෙස සැමදා ක්‍රීඩා කිරීමට අපි අජන්තට ශක්තිය ධෛර්‍ය ප්‍රාර්ථනා කළ යුතුයි.

ඒකට එක හේතුවක් තියනවා.ලංකාවෙ දඟ පන්දු යවන්නන් ගැන ලොකුම රුදාව තියෙන්නෙ ඕස්ට්‍රේලියාවට.ඒක අපි කවුරුත් හොදින් දන්නවනෙ.එයාලා ගහන්න පුලුවන් දහන් ගැට සේරම ගැහුවා මුරලිව විනාශ කරන්න.ඒත් ඒක කරන්න බැරිවුනා.ඔහු නුදුරු දිනක ක්‍රීඩාවෙන් සමුගත්තත් ඒ හා සමානම විශ්මිත දඟ පන්දු යවන්නෙක් නැවත ශ්‍රී ලංකාවෙන් බිහිවීම ඔවුන්ට ලෙහෙසියෙන් දරාගන්න හැකිවෙන එකක් නම් නැහැ.මුරලි අපේ රටට හැම ගෞරවයක්ම ලබාදුන්නා.ඒත් අපිට ඔහුගෙන් ඉටුකරගන්න බැරිවුන සිහිනයක් තියනවා.ඒක තමයි ටෙස්ට් තරඟයකදි ඕස්ට්‍රේලියානු කණ්ඩායම ඕස්ට්‍රේලියාවෙදිම පරාජය කිරීම.

දයාබර අජන්ත... ඒ සිහිනය සැබෑකරදීමට ඔබට හැකියවත් වාසනාවත් තිබෙන බව ක්‍රිකට් ලෝලී සියලුම දෙනාගේ විශ්වාසයයි.

ඔබට සදා ජය.....!!

කොටියාගේ රජ වීම හා බලු වීම

2008-08-20T23:11:00.003+03:00

මා සෞදි අරාබියෙ රැකියාව කරන කෙනෙකු නිසා මෙහිදී විවිධ රටවල විවිධ තරාතිරමේ මිනිසුන් ඇසුරු කිරීමට අවසථාව ලැබිලා තියනවා.පවතින අවිවේකී බව නිසා බ්ලොග් සටහන් ලිවීමට කාලය වෙන්කරගැනීම අපහසු වුවත් මේ සටහන මා කෙසේ හෝ තබන්නට සිතුවේ පසුගිය දිනක ඉන්දියවේ කේරල ජාතිකයකු පැවසූ කතාවක් නිසයි.

ඔහු පැවසූ කතාව වන්නේ අනාගත වාක්‍යකි.එනම් නුදුරු දිනක "ප්‍රභාකරන් ශ්‍රී ලංකවේ ජනාධිපති වන බවයි".මේ කතාව තවත් මොඩයෙකු කී කතාවක් ලෙස මට බැහැර කළ නොහැක්කේ ඔහු උන්මත්තකයකුවත් බුද්ධි හීනතාවයකින් පෙලෙන බවක්වත් ඔහුගෙ සාමාන්‍ය ක්‍රියාකාරීත්වයෙන් පිළිබිඹු නොවන නිසයි.

මේ පිළිබඳව මාගේ කල්පනාව වන්නේ භාහිර ලෝකය විසින් ප්‍රභාකරන් පිළිබඳව ඔහු තුල අති කරන ලද චිත්‍රය මෙය බවයි.මස් වැද්දෙකු වීරයකු කිරීමෙන් පමනක් නොනැවතී නුදුරු දිනක ඔහු ශ්‍රී ලංකාවේ ජනධිපති වීමට තරම් සුදුසු පුද්ගලයෙකු බව ලෝක ජනතාව තුළ මතයක් පතුරවා හරින්නට LTTE සංවිධානය උත්සහ කරන බවයි.සාවද්‍ය වීඩියෝ දර්ශන සහ ඡායාරූප යොදාගනිමින් ඔවුන් ලෝක ජනතාව මුලා කරනබව අප ඉතා හොදින් දනිමු.

සත්‍ය වසන් කරමින් LTTE සංවිධානයට වාසි සහගත වන අයුරින් විවිධ තොරතුරු පතුරවා හරින පුද්ගලයන් හා සංවිධාන ලෝකය පුරා ඕනෑතරම් විසිරී තිබේ.නමුත් විළිලැජ්ජාවට කාරනය වන්නේ දහස් ගනන් මිනිසුන් හා රාජ්‍ය දේපල විනාශ කරමින්ද, අහිංසක දෙමළ ජනතාව බිය වද්දමින්ද, කුඩා දරුවන් බලෙන් යුද්ධයට බඳවාගනිමින්ද, ලොව බිහිවූ කිසිම ආගමක් හෝ දර්ශනයක් සමඟ එකඟ නොවන්නාවූ ලෙසට ලොව ප්‍රථම මිනිස් බෝම්බය නිර්මණය කරමින්ද, පමනක් නොනැවතී වසර 2500ක ප්‍රෞඩ ශ්‍රී ලාංකික ඉතිහාසය විකෘත්ති කරමින්ද, ලෝකය වටා යමින් දෙමළ ජනතාවගේ එකම ගැලවුම්කරුවා ඔවුන් බව ලොවට කියද්දීත් එය අනුමත කිරීමට තරම් දීන වූ ශ්‍රී ලාංකිකයන්ද සිටීමය.

ඒ ආකාරයෙන් බැලූ විට කේරල ජතිකයාගේ ප්‍රකාශය අවඥාවෙන් බැහැර කළ හැකිය.කෙසේ වෙතත් අද දිනයේදී අපගේ වැදූ මව හා සමාන අප හැදී වැඩුන මතෘභූමිය ආරක්ෂා කරගැනුමට තම දිවි පරදුවට තබමින් ක්‍රියාන්විත රාජකාරියේ යෙදී සිටින සියලුම අංශ වල රණ විරුවන්ට අපගේ මවුබිම රැක ගැනීමට යෝධ බල, ශක්තිය, ධෛර්ය්‍ය ලැබේවායි ශ්‍රී ලාංකික අප සැම එක සිතින් ප්‍රාර්ථනා කළ යුතු වෙමු.

ජනාධිපති වීම කෙසේ වෙතත්, කොටි සමත් ගැලවී කොටියා බලු වන අවස්ථාව එනතෙක් ඉවසිල්ලෙන් බලාසිටිය යුතු සුවිශේෂී ඓතිහාසික කාල පරිච්ඡේදයක් අප පසු කරමින් සිටින්නෙමු.

පසුගිය දවස්..

2008-05-10T11:51:00.004+03:00

පසුගිය දවස් ටිකේම කලේ බ්ලොග් කියවන එක.පසුගිය දවසක මමත් බ්ලොග් කරුවන්ගේ සමූහයේ සාමාජිකත්වය ගත්තා.දැන් දිගට හරහට mail ගලගෙන එනවා මගෙ Gmail එකට.ඒ හරහා සෑහෙන දනුමක් ලබගන්න පුලුවන් වුනා.අලුතෙන් හදපු බ්ලොග් කරුවන්ගේ සින්ඩිකේටරය ගැන දැනගන්න ලැබුනෙත් ඒ හරහම තමයි.මමත් බ්ලොග් ලැයිස්තුවට මගෙ බ්ලොග් එකත් එකතු කලා.අපේ ප්‍රවීන බ්ලොග් කරුවො ඉඩක් තියන විදියට අපි වගේ ආධුනික බ්ලොග් කරුවන්ගෙ බ්ලොග් එකකට පුංචි comment එකක් දනවනම් හිතට පොඩි දිරියක් ලැබෙනවා.ඉදිරියටත් බ්ලොග් ලියන අදහසින් අදට නවතිනවා.

පුදුමයි ඒත් ඇත්තයි....!

2008-04-30T10:30:00.003+03:00

ලෝකයේ ඕනෑම රටක නම කියූ සැනින් සිතියමකින් එය පෙන්නන එක එතරම්ම පහසු දෙයක් නම් නෙමෙයි.ඒ සඳහා සෑහෙන කලයක් තිස්සෙ සිතියම් අධ්‍යයනය කළ යුතුයි.ඒත් අවුරුදු දෙකක පුංචි දරුවෙක් ඒ හපන්කම කරනවා බලන්න මෙන්න ඔබටත් අවස්ථාවක්.....

අලි බබා සහ හොරු හතලිහ

2008-04-28T11:16:00.008+03:00

පොඩි කාලේ අපි අලි බබා සහ හොරු හතලිහ කියල කතවක් අහල තියනවනෙ.ඒ අය හිටියයි කියල සැලකෙන තැනට යන්න අවස්ථාවක් මට ලැබුනා.ඒක සෞදි අරබියෙ "අල් හසා" කියන ප්‍රදේශයේ තියන විසාල ගල් කන්දක් තුල ස්වභාවිකව හැදුනු විශාල ගල් කුහරයක්.මේ කතාවෙ අත්ත නැත්ත මම හරියටම දන්නෙ නැතත් මෙක බලන්න වටින තනක් කියල හිතුන නිසයි මේ සටහන ලියන්නෙ.මේ ස්ථානය මෙහෙ අය හඳුන්වන්නෙ "ජබල් අල් ගාරා" කියන නමින්.මේ ගල් කන්ද පේන්නෙ මෙන්න මේ විදියටයි.

සාමාන්‍යයෙන් අපි කන්දක දැකල නැති හැඩතල තමයි මේ කන්දෙ දකින්න ලැබෙන්නෙ.පහල ඡායාරූපයෙන් පෙනෙන්නෙ ඒ විශාල කුහරයට අතුලුවෙන දැවැන්ත සිදුර.මිනිසුන්ගේ උසත් එක්ක සන්සන්දනය කලාම එහි විශාලත්වය හිතාගන්න පුලුවන්.

මෙතනින් අතුලුවන කෙනෙකුට විශාල ප්‍රදේශයක් පුරා පැතිරී ගිය විශාල බිම් ගෙවල් ප්‍රමානයක් දැකගන්න පුලුවන්.

ඔහොම යං.....

2008-04-26T10:04:00.003+03:00

පසුගිය මාසෙ බ්ලොග් ලියන්න පටන් ගත්තට එක දිගටම කරගෙන යන්න බැරිවුනා.ඒකට හේතුව වුනේ මගේ පරිඝණකය මාරුකරන්නට සිදුවීමයි.ඉඩක් ලැබෙන විදියට බ්ලොග් ලියන්න ආසයි.නමුත් මොකක් හරි වැඩක් යෙදෙනවා.එකත් එක හේතුවක්.කාලය කලමණාකරනය කිරීමත් කලාවක් කියලයි මට නම් හිතෙන්නෙ.කොහොම නමුත් මම නිතර අපේ බ්ලොග් කරුවන්ගේ බ්ලොග් කියවනවා.ඒ හරහා ගොඩාක් දේ දැනගන්න ලැබෙනවා.ඒ අතර විවිද මෘදුකාංග ගැන දැන ගන්නට ලැබීම සතුටට කරුණක්.ඔහොම යං.... ඔහොම යං....

ආයුබෝවන්....!

2008-03-10T21:59:00.005+03:00

මම රැකියාව කරන්නෙ සෞදි අරබියෙ.මෙහෙ ඉන්න කාලය තුලදි ලැබෙන විවේක අවස්ථාවන්වල මම පරිගණක පි‍ළිබඳව ස්ව්‍යං අ‍ධ්‍යයනයක යෙදෙන්න උත්සහ කලා.මා වැඩිපුරම උනන්දුවක් දැක්වුවේ ඡායාරූප සංස්කරණය හා පරිගණක එකලස් කිරීම සම්බන්ධවයි.අන්තර්ජාලය පිලිබද ලොකු උනන්දුවක් තිබුනත් ඊට අවස්ථාවක් නොලැබුනේ පෞද්ගලිකව අන්තර්ජාල සම්බන්‍ධතාවයක් පවත්වාගෙනයාම වියදම් අධික කටයුත්තක් වෙලා තිබුන නිසයි. නමුත් මාස හයක පමණ ඉහත කාලයක සිට සීමාරහිත අධිවේගී අන්තර්ජාල සම්බන්‍ධතාවයන් ඉතා පහසු මිලකට ලබාගැනීමේ අවස්ථාව අපට හිමිවුනා. මා සමග මෙහි සේවය කරන මිතුරන් විශාල ප්‍රමාණයක් දැන් අන්තර්ජාලය සමග සම්බන්ධ වෙලා. ඒක සතුටට කරුණක්.

නවකයන් ලෙස අන්තර්ජාලයට පිවිසෙන ශ්‍රී ලාංකික මිතුරන්ට අපගේ ශ්‍රී ලාංකික වෙබ් අඩවි සොයා යාම පහසු කරවන්නටත් මා පිළිබඳව යම් තොරතුරු ප්‍රමාණයක් දැනගන්නටත් හැකිවන පරිදි මා පෞද්ගලික වෙබ් අඩවියක් නිර්මාණය කලා.සැබවින්ම එහි මූලික අරමුණ මේ සියල්ල පිළිබඳව අධ්‍ය‍යනය කරන්නට අවස්ථාව සලසා ගැනීමයි. http://www.priyanthanet.piczo.com/ මේ වෙබ් අඩවියට මොහොතකට පිවිසෙන්න කියල මම ඔබ සියලුදෙනාටම ආරා‍ධනා කරනවා.ඔබේ අදහස් යෝජනා චෝදනා සියල්ල මෙය හදාරන මා හට මාර්ගෝපදේශකත්වයක් වේවි.

බ්ලොග් අඩවි ගැන උනන්දුව ඇතිවුනේ ඊටත් පස්සෙ.ඉඩ ලැබෙන ආකාරයට මෙම බ්ලොග් එක ලියන්න මම බලාපොරොත්තු වෙනවා.විවි‍ධ මතෘකා ඔස්සේ මේ සටහන් විවිද අයුරින් ගලාගෙන යාවි.ඒ හැම දෙයක්ම සංවාදයට ලක්කරමින් මා හා එකතුවන ලෙස මම ඔබ සැමගෙන් ඉල්ලා සි‍ටිනවා.ඒ අතරම බ්ලොග් ‍භාවිතා නොකරන අයටත් බ්ලොග් ‍භාවිතයට එක්වනලෙස මම අරාධනා කරනවා.
මගේ ප‍ළමු බ්ලොග් සටහන මෙයින් හමර‍යි.

ස්තුතියි..